திருச்செந்தூர் கோவிலுக்குள் புகுந்த மழைநீர்

பதிவு செய்த நாள் : 25 நவம்பர் 2021 17:07

திருச்செந்தூர், நவம்பர் 25,

கனமழை காரணமாக திருச்செந்தூர் கோவிலுக்குள் முதன் முறையாக வியாழனன்று வெள்ள நீர் புகுந்ததாகக் கூறப்படுகிறது.

தூத்துக்குடி, நெல்லை மற்றும் திருச்செந்தூர் மற்றும் அதன் சுற்றுவட்டார பகுதிகளில் இடியுடன் கூடிய இடைவிடாத பலத்த கனமழை பெய்து வருகிறது. தொடர்ந்து 3 மணி நேரத்திற்கும் மேலாக பெய்து வரும் கன மழையினால் சாலைகளில் மழை நீர் பெருக்கெடுத்து ஓடுகிறது.

கனமழை காரணமாக திருச்செந்தூர் கோவிலுக்குள்ளும் வெள்ள நீர் புகுந்தது. பக்தர்கள் கோவிலை விட்டு வெளியே வரமுடியாத நிலையில் தவித்து வருகின்றனர்.

கோவிலின் உள் மற்றும் வெளி பிரகாரங்களில் மழை நீர் வரத்து அதிகரித்து கொண்டேயிருப்பதால் ஊழியர்கள் மழை நீரை வெளியேற்றும் பணியில் ஈடுபட்டு வருகின்றனர். சுப்பிரமணிய சுவாமி திருக்கோவிலில் மழை நீர் புகுந்து தேங்கியது இதுவே முதன்முறையாகும்.